بااحبك يابلدى بكل اللغات ( بقلمى والصورة من أعمالى )
===============================
بااحبك يابلدى بكل اللغات
وعاشق ترابك لحد الممات
ويعجز كلامى ف ذكر الصفات
مهما بتقسى بعض الساعات
والا بتصعب فيكى حاجات
أو مَرَه تُهنَا ف بحر السكات
أو يعلى بينا صوت الآهات
لو كنت عايش يا دوب ع الفتات
غرقان ف همى باصحا وابات
لكن فى حبك تلاقى حكايات
بطعم الشقا ودموع أمهات
نسجها الغلابه بفخر وثبات
لاجل ما تِعلا ليكى الرايات
وتبقى عزيزه ف كل الجهات
ماهو انتى حياتنا وكل اللى فات
ومعاكى نغزل خيوط اللى آت
ونِفضَل نِحبك بكل اللغات
ونعشق حروفك بكل السِمات
ربك حَبَاكى عظيم الهِبَات
صاحبة حضارة وكمان معجزات
لأنبيا كانوا ورُسُل ورسالات
تشهد باسمك كثير م الآيات
إلهى يصونك من العَثرَات
يِرفع بكرمه ليكى الهامات
وفَرحَه كبيره تِمحِى الآهات
ونِفضَل نِحبك بكل اللغات
ليست هناك تعليقات:
إرسال تعليق